Isinilid sa plastic bag…
MANILA, Philippines — Isang 5-anyos na paslit ang natagpuang wala nang buhay at hinihinalang hinalay muna bago pinatay at saka isinilid sa isang plastic bag at iniwan sa loob ng isang abandonadong unit ng isang subdivision sa Brgy. Sabang, sa bayan ng Naic sa Cavite, kamakalawa ng gabi.
Kinilala ng pulisya ang biktimang kindergarten na si Chrizel Ann Alburo, residente ng Poso St. #20 Blk 28, Lot 11, Phase-1, Pasinaya Homes, Brgy., Sabang, Naic, habang tinutugis ng pulisya ang suspek na kinilala lang sa pangalang “Serge”, residente ng Integrity St. #74 Blk 12, Lt 26, Phase-1, Pasinaya Homes, ng nasabi ring lugar.
Sa imbestigasyon ni PO2 Rodrigo Candelario Veloso III, may hawak ng kaso, dakong alas-11:59 ng gabi nang madiskubre ng ilang mga nag-iikot na opisyal ng barangay ang katawan ng paslit sa bakanteng unit sa #76 Blk12, Lot 27, Phase 1, Pasinaya Homes, Brgy. Sabang ng bayang ito na nakasilid sa isang plastic bag. Halatang pilit na pinagkasya ang bangkay ng bata sa nasabing plastic dahil sa nakabaluktot na katawan nito sa loob ng plastic bag.
Lumalabas na huling nakitang buhay ang bata kasama umano ang nasabing suspek sa nasabing subdibisyon.
Nagsasagawa pa ng follow-up ang pulisya at isinailalim din sa autopsy ang biktima upang alamin kung ginahasa ba muna ito bago pinatay ng suspek matapos makitaan ng indikasyon na tila ginahasa ang batang biktima.