MANILA, Philippines — Nasa 645 pasahero ng Metro Rail Transit Line-3 ang nagsibabaan ng tren matapos na mag-apoy at umusok ang ilalim nito kamakalawa ng alas-6:02 ng gabi sa Quezon City.
Ayon sa pamunuan ng MRT-3 na nagkaroon ng ‘short circuit’ sa high voltage wire ng traction motor nito ang naging dahilan nang pag-apoy at pag-usok ng tren, na nagdulot ng tensiyon sa kanilang mga pasahero.
Kaagad na-detect ng operator ang problema ng tren kaya’t inihinto niya ito upang mapababa at matiyak ang kaligtasan ng mga pasahero.
Nabatid na dakong ala-6:02 ng gabi ng magka-aberya ang isang tren ng MRT-3 sa intersection ng Araneta-Cubao at Santolan kaya’t napilitang pababain ang mga pasahero at naglakad sa riles patungo sa isang istasyon.
Nagtagal ng kalahating oras o ala-6:35 ng gabi nang maibalik ang traction ng tren at kaagad itong dinala sa pocket track sa Shaw Boulevard station at maibalik sa normal ang operasyon ng linya ng tren.