MANILA, Philippines — Isang alagad ng batas ang nasawi habang napatay din nito ang suspek matapos magkabarilan nang tangkaing arestuhin ang huli makaraang magwala at manggulo sa isang basketball court naganap kamakalawa ng gabi sa Cavite City.
Ang nasawing pulis ay kinilalang si PO1 Joseph Tan, nakatalaga sa Cavite City Police at minsang nakilala matapos manalo sa pageant na “Gwapulis” noong 2016 sa isang programa ng isang kilalang TV station.
Kinilala naman ang suspek na si Musanip Palao, 49, residente ng F. Dela Cruz, Brgy. 37A, Caridad, ng naturang lungsod.
Ayon sa ulat, dakong alas-7:40 ng gabi nang maganap ang insidente sa Montano Hall, Brgy. 41 Caridad.
Naglalaro ng basketball ang biktima sa nasabing lugar nang biglang sumulpot ang suspek at nagwala at nanggulo ito.
Bilang pagtugon sa tawag ng tungkulin bilang pulis, tinangka ni PO1 Tan na arestuhin ang suspek ngunit tumakbo ito palabas ng basketball court.
Dito ay hinabol ni PO1 Tan si Palao ngunit pagsapit sa labas ay binaril nito pero bago pa man malagutan ng hininga ay nagawa pa nitong makaganti ng putok sa suspek dahilan upang mapatay din ito.
Patuloy ang imbestigasyon ng pulisya sa naturang kaso.