MANILA, Philippines — Isang jeepney driver na tumatayo ring pangulo ng kanilang asosasyon ang nasawi makaraang barilin ng isang hindi nakilalang salarin na nagpanggap na pasahero, kamakalawa ng gabi sa Malabon City.
Inisyal na nakilala ang nasawi na si Jerry Adolfo, nasa hustong gulang, at residente ng Brgy. Tinajeros, ng naturang lungsod. Blangko naman ang pulisya sa pagkakakilanlan sa salarin.
Sa paunang ulat, nakapila sa kanilang terminal si Adolfo sakay ng kanyang ipinapasadang jeep sa may Del Pilar Road, Brgy. Tinajeros dakong alas-7 ng gabi nang maganap ang pamamaril.
Nagpanggap umano na pasahero ang suspek at pumuwesto sa likod ng biktima saka bumunot ng hindi pa mabatid ng baril at barilin sa ulo si Adolfo.
Nagtakbuhan palabas ng jeep ang ibang nahintakutan na pasahero ngunit sumabay dito ang salarin kaya hindi na natukoy.
Ayon sa mga kasamahan, si Adolfo ay ikatlong pangulo ng kanilang asosasyon na napaslang. Dito ngayon nakatutok ang mga imbestigador upang mabatid ang motibo sa krimen at makilala ang nasa likod nito.