MANILA, Philippines - Ang mismong service firearm ng isang pulis ang pumatay sa kanya nang aksidenteng mahulog at pumutok at tumama sa kanya ang bala habang nag-aayos sa loob ng bahay kamakalawa sa Parañaque City.
Idineklarang dead on arrival sa ospital dahil sa tama ng bala sa dibdib ang biktimang si PO3 Ryan Buccat, 37, may-asawa, nakatalaga sa District Public Safety Batallion ng Southern Police District (SPD), nakatira sa Pascual Compound 1, Brgy. San Antonio ng naturang lungsod.
Sa salaysay ng misis ng biktima na si Daisy, 33, dakong alas-4:10 ng hapon siya’y naghahanda ng kanilang hapunan habang ang mister nitong si PO3 Buccat ay naghahanda naman ng mga personal nitong gamit sa kanilang kuwarto para sa pag-duty nang makarinig ng putok ng baril mula sa kanilang kuwarto.
Kaagad niya itong pinuntahan at nakita ang biktima na duguang nakabulagta kaya’t humingi ng tulong sa bayaw para ihatid ang mister sa ospital, subalit idineklara itong dead on arrival.