MANILA, Philippines – Nasugatan ang 7 sundalo makaraang masabugan ng bomba ang sinasakyang military truck na itinanim ng mga pinaghihinalaang miyembro ng mga bandidong Abu Sayyaf Group sa tabing daan habang dumaraan ang convoy ng Philippine Marines sa national highway sa Brgy. Lagtoh, Talipao, Sulu kahapon ng umaga.
Batay sa ulat,dakong alas-6:50 ng umaga habang dumaraan ang convoy ng military vehicle na sinasakyan ng tropa ng Marine Battalion Landing Team (MBLT 10 ) nang sumabog ang bomba na isang Improvised Explosive Device (IED) na ikinasugat ng pitong sundalo na mabilis na isinugod sa pagamutan.
Nagpapatuloy naman ang law enforcement operations ng ibinuhos na tropa ng militar sa Sulu na sa kasalukuyan ay aabot na sa mahigit 3,000 ang bilang upang durugin ang mga bandido na sangkot sa paghahasik ng terorismo.