MANILA, Philippines – Kapwa namatay ang driver ng motorsiklo at angkas nitong 4-anyos batang lalaki matapos na sila ay mabundol ng traktora kamakalawa ng gabi sa Navotas City.
Nasawi noon din ang biktimang si Niño Beltran, nasa hustong gulang, ng Breakwater, Isla Puting Bato, Tondo, Maynila, habang idineklarang dead on arrival sa ospital ang angkas nitong bata na si Sonny Belicario, ng Baseco, Tondo.
Nagtamo ng bahagyang sugat sa tuhod ang isa pang angkas na si Elvie Ibañez, 29, ng Baseco, Tondo na dinala rin sa nabanggit na pagamutan.
Batay sa ulat, bago nangyari ang aksidente dakong alas-6:20 ng gabi sa kanto ng C-3 Road at M. Naval Street sa Brgy. North Bay Boulevard South ay patawid ng C-3 Road ang motorsiklo na minamaneho ni Beltran nang mabundol ng traktora (AJA-9840) na minamaneho ni Alvin Joey Guttierez, 28, ng Bitungol, Bulacan dahil sa bigla umanong tumawid ang motorsiklo.
Nakatakdang kasuhan si Guttierez ng reckless imprudence resulting in double homicide at physical injuries.