MANILA, Philippines - Hindi na umabot ng buhay sa ospital ang isang 21-anyos na construction worker habang ang isang kasamahan ay nilalapatan ng lunas matapos na kapwa makuryente habang nagkakabit ng bakal sa itinatayong gusali sa Ermita, Maynila, kahapon ng umaga.
Ang nasawi ay kinilalang si Noel Sale, stay-in steelman sa construction site na matatagpuan sa no. 1863 Pilar Hidalgo Lim st., Ermita at ang nasugatan ay si Adrian Pantua, 24, ng P. Paredes St., Sampaloc, Maynila.
Batay sa ulat, bago nangyari ang aksidente dakong alas-10:30 ng umaga sa nasabing construction site ay hawak ng dalawang biktima ang isang steel bar na ikakabit sa itaas na bahagi ng itinatayong gusali nang sumabit ito sa live wire. Sa sobrang lakas ng boltahe ay hindi nakaya ang suot na protective gear o gloves at pumutok kaya’t nagkikisay ang dalawa.