MANILA, Philippines – Binaril ng isang sekyu ang isang binata na nag-aaplay ng trabaho matapos niyang mapagkamalan na magnanakaw kahapon sa Valenzuela City.
Hindi na umabot ng buhay sa Valenzuela Medical Center sanhi ng tinamong tama ng bala ng shotgun sa likod ng ulo ng biktima na si Joshua Valdez, 18, ng Paso De Blas ng nasabing lungsod.Habang ang suspek na tumakas ay kinilalang si Ramon Gabitan, 25.
Batay sa ulat, bago nangyari ang krimen dakong alas-12:30 ng hapon sa Valdez Compound, Paso De Blas ay mag-aaplay umano ng trabaho ang biktima sa nasabing lugar nang sitahin ito ng suspek sabay kinasahan ng hawak na shotgun na naging dahilan upang mapatakbo sa labis na takot si Valdez at pinutukan ito ng suspek.
Nang bumulagta ang biktima ay mabilis na tumakas ang suspek habang dinala ang biktima sa nasabing pagamutan ngunit hindi na rin ito umabot ng buhay.