MANILA, Philippines – Hindi na umabot ng buhay sa ospital ang isang traffic police nang ito ay pagbabarilin ng hindi pa nakikilalang suspek habang nakatayo sa kanyang tindahan sa loob ng Bagong Silang Wet Market na matatagpuan sa Phase 4, Barangay Bagong Silang, North Caloocan.
Ang nasawi dahil sa maraming tama ng bala sa ulo ay kinilalang si SPO3 Carmelito Selvino, kasalukuyang nakatalaga sa Caloocan City Traffic North.
Batay sa ulat, bago ang pamamaril dakong alas-12:20 ng tanghali ay nakatayo ang biktima sa harap ng kanyang stall sa nasabing palengke nang dumating ang isang lalaki at walang salitang pinagbabaril ito.
Nang bumulagta ang biktima ay dali-daling tumakas ang suspek. Patuloy ang imbestigasyon kung may kinalaman sa trabaho ng biktima bilang traffic police ang pagpatay sa kanya.