MANILA, Philippines - Patay ang isang lalaki na sinasabing senglot na nakatulog sa kalsada matapos itong masagasaan ng dump truck sa Barangay Nantawakan, bayan ng Kasibu, Nueva Vizcaya kamakalawa.
Kinilala ni P/Chief Insp. Larry Pinkihan, hepe ng Kasibu PNP ang biktima na si Camilo Habiling, 30, ng nasabing barangay.
Sa imbestigasyon ng pulisya, nagkaroon umano ng bayanihan sa nabanggit na barangay kung saan dinaluhan ng ilang kalalakihan kabilang ang biktima at nagkainuman.
Gayon pa man, bandang alas-8 ng gabi ay nagpaalam ang biktimang lango na sa alak na uuwi sa Sitio Domang subalit ilang minuto pa ay nadaanan ng ilang kalalakihan na nakatulog sa gitna ng tire path ang biktima.
Dakong alas-11 ng gabi naman nang dumaan ang dump truck na minamaneho ni Barangay Kagawad Henry Tayaban sa nabanggit na lugar kung saan hindi sinasadyang masagasaan ang biktima.
Hindi umano agad nakita ng driver ang biktima dahil sa nasa loob nito ng pababang bahagi ng kalsada.
Huli na nang makita ng driver na pamangkin niya ang nasagasaan na agad naman isinugod sa pagamutan subalit idineklarang patay.