Pampasaherong jeep niratrat: 6 sugatan
MANILA, Philippines – Pinagbabaril ng hindi pa kilalang mga kalalakihan ang isang pampasaherong jeep habang bumabagtas sa highway ng Brgy. Sinanguyan, Don Carlos, Bukidnon na ikinasugat ng anim katao na naganap kamakalawa.
Ang mga nasugatan ay kinilalang sina Tawal Baguil, 46; Nasrudin Tamano, 37; Antonio Saavedra, 40, pawang kasapi ng Cowboy Security Detective Agency; Juliet Baguil, 37; Johnny Manlapay, 35 at Elvira Mullanta, 20.
Batay sa ulat, dakong alas-11:40 ng umaga habang bumabagtas ang pampasaherong jeep nang ito ay paulanan ng bala ng mga suspek na nakaposisyon sa highway.
Tumagal ng ilang minuto ang pamamaril bago nagsitakas ang mga suspek patungo sa hindi pa malamang destinasyon.
Lumilitaw pa sa imbestigasyon na ang nasabing mga security guards ay inupahan ng negosyanteng si Juanita Regondula dahilan sa umiinit umanong alitan sa bahagi ng lupaing pag-aari nito sa Brgy. Sinangguyan sa nasabing bayan.
- Latest
