MANILA, Philippines – Isang lalaki na labas-pasok umano sa kulungan sa kasong panghoholdap ang pinagbabaril habang naglalakad kamakalawa ng gabi sa Malabon City.
Ang biktima na namatay noon din dahil sa mga tama ng bala sa iba’t ibang parte ng katawan ay kinilalang si Guillermo Solis, Jr., 33, residente ng No. 43 Sta. Isabel St., Sto. Rosario Village, Brgy. Baritan ng naturang lungsod.
Sa ulat, dakong alas-8:30 ng gabi ay naglalakad mag-isa ang biktima nang harangin at paputukan ng mga hindi nakilalang salarin na mabilis tumakas matapos matiyak na patay na ang biktima.
Sa record,lumalabas na dati nang naaresto si Solis at nakulong sa kasong robbery snatching at robbery with violence ngunit nagawang makapagpiyansa nitong Oktubre 30.