MANILA, Philippines – Inihayag ng pamunuan ng Department of Education (DepEd) na pinag-aaralan na ang pagbibigay ng dagdag na bayad sa mga guro na magsisilbing Board of Election Inspector (BEI) sa nalalapit na May 2016 national elections.
Ayon kay DepEd Secretary Armin Luistro, iniutos na sa mga staff na pag-aralan ang lumalakas na panawagan na dagdagan ang bayad sa mga guro na itatalaga bilang BEI sa susunod na election.
Noong 2013 election, ang mga guro ay binigyan ng P3,000 at dinagdagan ng P500 para sa pagtesting at pagselyo habang P500 naman para sa transportasyon.
Subalit ang bayad na ito ay hindi sapat sa haba ng oras ng serbisyo ng mga guro dagdag pa ang banta sa kanilang buhay kapag ang napuwestuhan ay elections hotspots.
Nakikipag-ugnayan na ang DepEd sa mga awtoridad para naman masiguro ang kaligtasan ng mga guro.
Ang pagtataas sa bayad sa mga BEI ay una ng hiniling na itaas hanggang sa P8,000 ang serbisyo ng mga guro sa darating na halalan.