MANILA, Philippines - Isa na namang disqualification case ang isinampa kay Senator Grace Poe na dating kaalyado ng kanyang amang si Fernando Poe Jr., na si dating Senador Francisco “Kit” Tatad sa Commission on Elections (Comelec).
Nakasaad sa kasong isinampa ni Tatad, na hindi umano dapat na payagang tumakbo sa 2016 elections si Poe dahil sa paglabag nito sa Article 7, Section 2 ng Constitution kung saan nakatala ang kuwalipikasyon ng mga presidential candidates.
Kasama ni Tatad si Atty. Manuelito Luna na kumatawan sa natalong senatorial candidate na si Rizalito David na unang nagsampa ng disqualification case laban kay Poe sa Senate Electoral Tribunal.
Partikular na tinukoy ni Tatad ang umano’y hindi pagiging natural-born Filipino ni Poe dahil siya ay isang ampon na walang makapagsabi kung sino ang kanyang tunay na magulang.
Nabigo rin si Poe na kumpletuhin ang kanyang 10-year residency requirement na nakasaad sa Constitution.
Itinuturing naman ng tumatayong spokesperson ni Poe na si Valenzuela City Mayor Rex Gatchalian na isang “dirty tactic” ang panibagong disqualification case.
Matatandaang nagsampa rin noong nakaraang linggo ng disqualification case ang isang Atty. Estrella Elamparo at kinuwestiyon din ang kakulangan sa mga kuwalipikasyon ni Poe na tumakbo sa 2016 elections.