MANILA, Philippines - Kalaboso ang 40-anyos na pekeng Army major matapos itong masamsaman ng apat na baril at mga bala sa loob ng presinto ng pulisya sa bayan ng Manaoag, Pangasinan kamakalawa ng umaga.
Sa pahayag ni P/Senior Insp. Roderick Gonzales, hepe ng Manaoag PNP, nagsadya sa himpilan ng pulisya ang suspek na si Joseph Vinluan ng bayan ng Urbiztondo upang magpasama sa bahay ni Vice Mayor Lito Arenas. ?
Gayon pa man, naghinala si Gonzales sa pagkatao ng suspek kung saan pinaberipika ang pagkatao nito sa kanyang mga tauhan.
Lumilitaw na hindi nakatala sa official roster ng AFP bilang opisyal ang suspek kaya kaagad na dinakma ito ng pulisya.
Nasamsam sa suspek ang tatlong cal.9mm pistol at isang cal. 45 pistol sa kotse ni Vinluan habang inaalam ng pulisya ang tunay na pakay nito sa bise alkalde.