Helper napisak ang ulo sa gate
MANILA, Philippines – Namatay habang ginagamot sa ospital ang isang helper matapos na maipit ang ulo nito sa gate na bakal na umano ay biglang isinara ng sekyu kamakalawa sa Quezon City.
Ang nasawi ay kinilalang si Jay-Mar Jagarap, 23, ng No.6517-Libis Espina, Brgy. 18, Caloocan City.
Itinuring na suspek ang sekyu na si Victorio Calidguid, 48, ng Kislap Security Agency, at naninirahan sa Block 22, Lot 20, Tawid Sapa 2, Brgy. Kaligayahan, Novaliches.
Batay sa ulat, dakong alas-5:00 ng hapon ay magdedeliber ang biktima nang order ng kumpanya na Allied Concrete Products na matatagpuan sa No.91 North Zuzuarregui St., Brgy. Old Balara.
Bumaba ang biktima sa kanilang truck at papasok sa bahagyang nakabukas na gate na bakal para ipakita sa sekyu ang dalang resibo nang biglang sumara ng malakas ang magkabilang gate sa hindi mabatid na kadahilanan at nasapul ang ulo ng biktima.
Nagawa pang maisugod ang biktima sa Gen. Malvar Hospital, subalit binawian ng buhay habang ito ay ginagamot.
Inimbestigahan ng pulis ang sekyu para mabatid kung nagkaroon ng manual function ang gate na ikinasawi ng biktima.
- Latest
