Pinay bomb expert dinakip sa Saudi

MANILA, Philippines - Isang Pinay na umano ay eksperto sa paggawa ng bomba at isinasangkot sa pagplano ng terror attack ang naaresto sa isang raid sa Riyadh, Saudi Arabia.

Ayon sa ulat na nakarating sa pamunuan ng  Department of Foreign Affairs (DFA) na  inaresto ng Saudi Arabian authorities ang isang Syrian national kasama ang kanyang kasabwat na Pinay na inakusahan ng terror plot.

Nakikipag-ugnayan na ang Embahada ng Pilipinas sa Riyadh sa Saudi authorities upang kumpirmahin ang nasabing ulat.

Ang dalawa umano ay dinakip kasunod ng isinagawang pagsalakay ng Saudi authorities sa kanilang hideout na umano’y pagawaan din ng mga ilegal na pampasabog sa Al-Fayah District.

Sa ulat ng state news agency (Saudi Press Agency) na ang hindi pinangalanang Pinay ay ang nagsisilbi umanong taga-gawa ng explosive belts/vest para sa Syrian na kinilalang si Yaser Mohammed Al-Barrazi na tumutulong sa paghahanda ng pag-atake, ayon na rin sa Interior Ministry ng Saudi Arabia.