MANILA, Philippines - Nadakip kahapon ng umaga ang isa sa mga suspek na namaril at naghagis ng granada sa mag-asawang Marlito at Liezel Morales sa Brgy.Bayog, Los Baños, Laguna noong Lunes.
Kinilala ng mga otoridad ang suspek na si Donald Dela Rosa, 30, na natunton ng tracker team ng Laguna police sa Brgy. Gabun, Lasam sa Cagayan na isa sa bumaril at naghagis ng granada sa mag-asawa.
Ayon kay Senior Supt. Florendo Saligao, hepe ng Laguna provincial police, positibong tinukoy ng mga saksi si Dela Rosa nang ipakita sa kanila ang mga larawan nito sa Facebook.
Una nang sinabi ng mga otoridad na aabot sa dalawa hanggang tatlong suspek ang nasa likod ng pagpatay sa mag-asawang Morales.
Magugunita na noong Lunes ng umaga nang pagbabarilin at hagisan pa ng granada ng mga suspek ang nakaparadang Toyota Avanza (ULQ 484) na sinasakyan ng mag-asawa na naging dahilan para masunog ang mga ito.
Bukod sa granada, dalawang uri ng baril ang ginamit sa pagpatay sa mag-asawa-isang kalibre .45 at isang 9-millimeter pistol.
Narekober ng mga otoridad sa pinangyarihan ng krimen ay ang bugkos ng perang nagkakahalagang P100,000.
Sinsilip ng pulisya ang anggulo ng droga sa kaso ng mag-asawang Morales matapos na matukoy na mga kilalang ‘drug personalities’ sa San Pablo City, Laguna na ang operasyon ay umaabot rin sa Quezon, Batangas at iba pang lugar sa lalawigan ng Laguna.
Nakatakdang sampahan ng kasong murder ang suspek.