‘Clash of clans’: 8 todas
MANILA, Philippines – Nasawi ang walong katao matapos na magbakbakan ang dalawang magkalabang angkan kamakalawa sa Brgy. Pislong, Siasi, Sulu.
Tatlo sa walong nasawi ay kinilalang sina Sakili Musahari; Mackdil Allam; at Koler Amado habang inaalam pa ang pagkakilanlan ng limang iba pa.
Sa ulat na nakarating kay Brig. Gen. Allan Arrojado, Commander ng Joint Task Group (JTG) Sulu dakong alas-5:10 ng hapon nang sumiklab ang palitan ng putok sa pagitan ng magkalabang angkan mula sa pamilya nina Brgy. Chairman Rashid Hadjiluddin at Allam Sayadi.
Sa salaysay ng mga residente na nagulat na lamang sila nang makarinig nang sunud-sunod na mga putok ng baril na nagmumula sa Sitio Masilam, Brgy. Pislong at nakita nila na nagbabarilan ang magkalabang angkan.
Tumagal ng may 40 minuto ang palitan ng putok na ikinasawi ng walong katao habang nasugatan sina Alsid Ilaji at Alam Sayadi, lider ng mga nanguna sa pag-atake laban kina Hadjilludin.
Ang dalawang angkan ay matagal nang magkalaban at sa tuwing magkrukrus ang landas ay nagbabarilan ang mga ito.
Kasalukuyan pang iniimbestigahan ang kasong ito habang namagitan na rin ang pulisya at militar laban sa grupo ng magkalabang angkan.
- Latest
