MANILA, Philippines – Napatay ang 71-anyos na biyudang trader matapos itong tambangan ng di-kilalang lalaki sa harapan ng Malate church sa Malate, Maynila noong Sabado ng gabi.
Dalawang tama ng bala ng baril sa ulo ang tumapos sa buhay ni Nora Eubanas ng #1827 Taft Avenue, Malate, Maynila.
Sugatan naman ang 22-anyos na apo ng biktima na si Mikhael Eubanas matapos tamaan ng basag na salamin ng minamanehong SUV na may plakang XDN-719.
Sa ulat ni SPO2 Jonathan Bautista ng Manila Police District-Homicide Section, dakong alas 6:45 ng gabi nang maganap ang pamamaril sa harapan ng simbahan sa M.H. Del Pilar sa nasabing lugar.
Nakaligtas naman ang kapatid ni Nora na si Adella Euchanico.
Lumilitaw sa pagsisiyasat na kalalabas lamang ng simbahan ng biktimang si Nora kung saan pagsakay sa SUV ay lumapit ang gunman saka pinutukan ang matanda bago naglakad lamang papalayo ang killer na animo’y walang naganap na pamamaril.
Pinaniniwalaang pakay lamang patayin si Nora dahil si Adella at ang apo ay hindi naman binaril.
“Ayaw magbigay ng impormasyon ng pamilya. ‘Yung anak na doktor nagsabi na saka na lang magsasalita pag nailibing na yung nanay nila,” paliwanag pa ng imbestigador
Naniniwala si SPO2 Bautista na maaaring may alam ang pamilya ng biktima sa motibo ng pamamaslang.