MANILA, Philippines - Nasa mahigit 100 Bangsamoro Islamic Freedom Fighters (BIFF) na ang napapatay sa all out offensive ng tropa ng militar sa panibagong engkuwentro sa swamp area ng Brgy. Pamalian, Shariff Saydona, Maguindanao kamakalawa ng hapon.
Sinabi ni AFP Spokesman Brig.Gen. Joselito Kakilala na kabilang sa mga kumpirmadong nasawi ay dalawang pamangkin at isa pang kamag-anak ng wanted na bomb expert na si Abdul Basit Usman na sina Rene Masabpi at Kumidi Simeon.
Sinabi nito na ang pagkamatay ng mga kamag-anak ni Usman ay indikasyon na malapit nang masukol ito ng tropa ng militar.
Pinabulaanan rin ni Kakilala na nakatakas sa military operation sa SPMX box-Salvo, Pagatin, Mamasapano at Shariff Aguak si Usman at ang lima pang dayuhang terorista na kasama nito.
Nabatid na napapalibutan na ng operating troops ng Marine Battalion Landing Team (MBLT) 8 sa pamumuno ni Lt. Col.Willy Manalang ang grupo ni Usman at lima pang dayuhang terorista na kinakanlong ni BIFF Commander Mohammad Ali Tambako.