Lasing na makulit tepok sa suntok
MANILA, Philippines - Hindi na umabot ng buhay sa ospital ang isang 25-anyos na computer technician matapos itong bumulagta sa suntok ng isang menor edad sa loob ng tinutuluyang bahay, kahapon ng umaga sa Sampaloc, Maynila.
Ang nasawi ay kinilalang si Aries Canlas, ng #1626 Don Quijote St., Sampaloc, Maynila.
Naaresto ang mag-utol na sina Victor Tapel alyas “Boyoy”, 17, at kapatid nitong si Leonard Tapel, alyas “Maequiz”, 19, kapwa xerox operator na kasamahan sa trabaho ng biktima sa Jian Internet Café kung saan sila stay-in.
Batay sa ulat, bago nangyari ang insidente dakong alas-2:20 ng madaling araw sa loob ng nasabing computer shop ay lasing umano ang biktima at kinukulit ang natutulog na magkapatid.
Kahit hindi umano pinapansin ng magkapatid ang biktima ay patuloy ito sa pangungulit hanggang sa tumayo at magalit si Victor na sinapak pa umano ng biktima.
Gumanti si Victor at pinakawalan ang malakas na suntok at dahil sa kalasingan ay bumagsak ang biktima na nilalabasan ng dugo sa bibig kaya dinala ito sa pagamutan, subalit namatay din ito.
- Latest
