MANILA, Philippines – Hinagisan ng granada ang harapan ng isang bangko ng lalaking nakamotorsiklo kahapon ng madaling araw sa Navotas City.
Batay sa ulat, dakong alas-3:45 ng madaling araw nang dumagundong ang malakas na pagsabog sa tapat ng Philippine National Bank (PNB) Navotas branch sa may Mariano Naval Street na hindi kalayuan sa Navotas Police Station.
Sinabi ng duty desk officer ng Navotas City Police na si SPO4 Domingo Ceneta, narinig niya ang pagsabog at inakala na may sasakyan na nasabugan lamang ng gulong.
Kaya’t tiningnan niya ito at nakita ang isang lalaki na lulan ng motorsiklo na mabilis na umalis sa lugar ng pagsabog.
Narekober sa lugar ng pagsabog ang piraso ng safety lever, isang striker assembly, at ilang fragments ng granada.