MANILA, Philippines - Sugatan ang limang katao kabilang ang isang pulis matapos na sila ay suwagin ng kalabaw na nakatakdang katayin kamakalawa sa kahabaan ng Gutierrez Drive, Brgy. Putik, Zamboanga City.
Ang mga nasugatan na dinala sa Zamboanga Peninsula Medical Center ay kinilalang sina SPO1 Sylvia Dicen; Gian Ozzy Romo, 6; Joseph Pulad, 34; Sarah Jean Seballos, 20; at Shikenah Tueres,15.
Batay sa ulat, bago ang insidente dakong alas-9:30 ng umaga nang magwala ang kalabaw na pag-aari ni Brgy. Councilor Nolia na nakatakdang katayin para ihanda sa pagsalubong sa Bagong Taon.
Nabatid na habang inihahanda ang lugar na pagkakatayan ng mga matadero ay tila nakaramdam ang hayop nang ito ay magwala at manuwag ng mga sibilyan sa lugar.
Eksakto namang napadaan sa lugar si SPO1 Dicen at ng makitang sinusuwag ng mabangis na kalabaw ang batang si Romo ay napatakbo ito upang iligtas ang bata pero maging siya ay sinuwag din.
Nagtulung-tulong ang mga residente hanggang sa mahuli ang nasabing hayop.- Joy Cantos-