MANILA, Philippines - Isang preso mula sa Manila City Jail ang dinala ng kanyang kapatid na babae sa Jose Reyes Memorial Medical Center (JRMMC) na nasawi matapos na ito ay atakihin sa puso.
Nabatid na itinawag ng ospital sa pulisya ang namatay na si Willyhado Gueta, 53, na nalagutan ng hininga noong Disyembre 25, bandang alas-3:20 ng madaling araw.
Nakasuot ng kulay dilaw na t-shirt na may tatak na Manila City Jail Detainee si Gueta.
Lumalabas sa imbestigasyon na isang babae na kapatid ng biktima ang kasama nito sa pagamutan at iniwan ito.
Matapos madala sa pagamutan, hindi na nagbalik ang babae.
Wala namang nakitang anumang sugat sa katawan ng biktima na pinaniniwalaang inatake.
Ang ipinagtataka ng pulisya kung bakit ang nagsugod sa biktima sa pagamutan ay ang kapatid nito at hindi mga jailguards na isang regulasyon ng Bureau of Jail Management and Penology na kailangan na bantayan ang sinumang detainee sa kulungan man o ospital.