MANILA, Philippines - PITUMPONG kababaihan na ilan dito ay menor de edad, na pawang umano’y binubugaw at nagsasayaw ng hubo’t hubad ang nasagip nang pinagsanib na puwersa Pasay City Police, Department Of Justice (DOJ) at Criminal Investigation and Detective Group (CIDG) kahapon ng madaling araw sa isang ktv bar sa naturang lungsod.
Ayon sa report ng pulisya, alas-12:00 madaling-araw nang ma-rescue ang mga kababaihang nagtatrabaho sa D’CZAR KTV Bar, na matatagpuan sa Roxas Boulevard, Pasay City sa isang joint entrapment at rescue operation ng pulisya at Inter Agency Council Against Trafficking ng DOJ.
Sa naging operasyon ng mga awtoridad, bumungad agad sa kanila ang mga babaeng nagsasayaw na karamihan dito ay pawang nakahubad at naka-table sa mga dayuhan sa mga VIP rooms ng club.
Na-recover din sa ilang kuwarto ang mga nagamit at nakapakete pang condom na hinihinalang ginagamit sa mga babaeng nai-table ng kanilang mga customer. May bold show din umano at bar fines kung saan maaaring ilabas ang mga babae sa halagang P8,000.
Isasailalim sa dental aging at counseling ang mga nasagip na babae sa tanggapan ng Department of Social Welfare and Development (DSWD).
Sa ngayon ay iniimbestigahan na ng National Bureau of Investigation (NBI) ang mga posibleng sangkot sa human trafficking at sakaling mapatunayan may nilabag ang naturang ktv bar ay maaari itong ipasara ng Department of Labor and Employment (DOLE).