MANILA, Philippines - Namatay habang nilalapatan ng lunas sa ospital ang isang Japanese national nang ito ay barilin ng isang lalaki na sakay ng motorsiklo habang nakasakay sa taxi ang una kamakalawa ng gabi sa Las Piñas City.
Ang nasawi ay kinilalang si Shinsuke Toba, nasa hustong gulang, na nagtamo ng mga tama ng bala sa ulo at katawan.
Batay sa ulat, dakong alas-11:30 ng gabi ay sakay ang biktima kasama ang isang kababayan sa taxi na minamaneho ni Rodito Atibagos, 68, ng Tondo, Manila.
Habang binabaybay ang kahabaan ng C-5 Extension Road, Brgy.Manuyo 2 ay ipinahinto ng biktima ang taxi dahil sa tawag ng kalikasan.
Nang huminto ang taxi ay sumulpot ang suspek na sakay ng motorsiklo na hindi naplakahan at walang kaabog-abog na pinagbabaril ang biktima.
Matapos ang pamamaril ay mabilis na tumakas ang suspek at ang biktima ay dinala sa pagamutan, subalit namatay din ito.