MANILA, Philippines – Nasawi ang apat na pasahero kabilang ang 3 bata habang 31 pa ang nasugatan matapos ang sinasakyan nilang bus ay sumalpok sa pader naganap kamakalawa sa Albay.
Ang mga biktima na idineklarang dead on arrival sa Bicol Regional Training and Teaching Hospital sa Legazpi City ay kinilalang sina Grace Ann Abrigo, 8; kapatid nitong si Maria Georgina, 7; Ryan Percival, 4; pawang residente ng Brgy. Salvacion, Pilar; at ang titser na si Princess Dichoso, 26-anyos na dalawang buwan buntis ng Capoy, Sorsogon.
Sa ulat, dakong alas-9:00 ng umaga ay binabaybay ng Dondon Bus Liner na galing Sorsogon ang pakurbang bahagi ng national highway sakop ng Brgy. Kimantong, Daraga nang maputol ang molye nito.
Nagloko ang takbo ng bus at tumagilid bago humampas ang likurang bahagi nito sa pader na kung saan nandoon nakaupo ang mga nasawi.
Ang driver ng bus na si Rommel San Buenaventura ay nasa kustodiya ng pulisya at nakatakdang kasuhan.