MANILA, Philippines - Hindi na umabot ng buhay sa ospital ang isang construction worker nang ataduhin ito ng saksak ng kasama trabaho na nainis dahil sa pag-recruit sa kanya na sumali sa isang kulto kamakalawa ng gabi sa Port Area, Maynila.
Ang nasawi ay kinilalang si Angelito Marinez ng 1-A4 Gawad Kalinga, Baseco Compound, Port Area, Maynila.
Naaresto ang suspek na si Rogelio Ravallo, 50, ng 1-A5 Gawad Kalinga, Baseco Compound, Port Area, Manila.
Sa report dakong alas-6:40 ng gabi sa Baseco Compound ay pinipilit umano ng biktima na sumapi sa kulto ang suspek.
Nang hindi pumayag ay pinagtulungan itong gulpihin ng biktima at dalawang kasamahan pa. Nakapa naman ng suspek ang nakasukbit niyang patalim kaya pinagsasaksak ang biktima habang ang dalawang kasama ay nakatakbo.