MANILA, Philippines - Hinostage ng isang 41-anyos na seaman ang kanyang sarili upang hindi maaresto matapos na ireklamo ito ng pananakit ng kanyang misis kahapon ng umaga sa Quezon City.
Tinutukan ng suspek na kinilalang si Ariel Tolones,ang sarili ng patalim matapos dumating ang mga pulis upang siya ay arestuhin.
Sa ulat, alas-5:00 ng umaga nang puntahan ng suspek na noon ay lasing ang bahay ng misis na si Gresilda, 44, guro, at kinompronta tungkol sa educational plan ng tatlo nilang anak.
Ang komprontasyon ay nauwi sa pagtatalo at sakitan na kung saan ay nagawang makatalon ng biktima at nagtungo sa barangay para ireklamo ang mister.
Rumesponde ang mga opisyales ng barangay kasama ang tropa ng QCPD station 6 at pinuntahan ang suspek para imbitahan sa barangay.
Habang kinakausap ng pulis ang suspek ay nagawang nakalabas ang tatlong bata kaya’t hinostage lang nito ang sarili.
Isinagawa ang negosasyon at pagkalipas ng 20 minuto ay sumuko ang suspek na pinag-aaralan pa kung kakasuhan.