Hepe ng pulisya, itinumba

MANILA, Philippines - Isang acting chief of police ang nasawi nang pagbabarilin ng hindi pa nakilalang mga suspek kamakalawa ng gabi sa  Brgy. Sta. Fe, Danao, Bohol.

Kinilala ang  nasawing biktima na si SPO1 Noel Romagos, 47, may asawa, officer in charge ng Danao Police Station at residente ng Brgy. Cantubod, Danao ng lalawigang ito.

Sa ulat bandang alas-7:30 ng gabi ay kasalukuyang sakay ng motorsiklo ang biktima kasama ang misis nito pauwi sa kanilang bahay nang pansamantala silang huminto at bumaba ang misis para kausapin sandali ang isa nitong kaibigan sa lugar.

Habang hinihintay ng biktima ang kaniyang misis ay biglang sumulpot ang dalawang armadong suspek na nagtanong pa dito at ilang saglit ay pinagbabaril na ito.

Nang bumagsak sa lupa ay muli itong nilapitan ng mga suspek at muling pinagbabaril bago nagsitakas.