Magpinsan nalunod sa ilog

MANILA, Philippines - Kapwa natagpuang lumulutang sa ilog ang isang magpinsan matapos na sila ay malunod habang naliligo sa ilog kamakalawa sa Brgy. Sto Niño, Sindangan, Zamboanga del Norte.

Ang dalawang nasawi ay kinilalang sina Michelle Vergara, 11 at Ivy Balili, 13 pawang residente ng Brgy. Paraiso ng bayang nabanggit na magkasunod na lumutang isang oras makaraang malunod ang mga ito sa ilog ng nasabing barangay.

Sa ulat, bandang alas-10:00 ng umaga nang magkayayaang maligo sa ilog ang magpinsan sanhi ng mainit na panahon at habang masayang naliligo ay napagawi sa malalim na bahagi ng ilog si Michelle na nalunod sa insidente.

Habang ito ay nagkakawag sinaklolohan naman ito ng pinsan na si Ivy kung saan nanguyapit rito ang una bunsod upang kapwa sila malunod.

Isang oras ang nakalipas bago narekober ang bangkay ng magpinsan.