Kanta na ‘My Way’ pumatay

MANILA, Philippines - Muli na namang may nasawi sa umano’y itinuturing na “killer song” ni Frank Sinatra na My  Way na tila may sumpa matapos isang la­laki ang napatay sa saksak habang inaawit ito sa isang videokebar  sa Zamboanga City kamakalawa.

Sa ulat ni Chief Ins­pector Ariel Huesca, Spokesman ng Police Regional Office (PRO) 9 kinilala ang biktima na si  Nonito Bernardo, 47-anyos na namatay noon din dahil sa mga tinamong saksak sa iba’t ibang bahagi ng katawan.

Nasugatan at dinala sa pagamutan ang kaibigan ni Bernardo na si Fernando Aragon, 52-anyos na nagtamo ng sugat sa katawan.

Ang suspek na kusang loob na sumuko sa pulisya ay nakilalang si Arnel Faustino, 38- anyos.

Sa imbestigasyon, dakong ala-1:00 ng madaling-araw sa loob ng isang videoke house sa Sitio Pagsanjan, Brgy.Calabasa ng lungsod  ay nagkakasiyahan ang mga biktima at ang grupo ng suspek nang mag-agawan ang mga ito sa mikropono sa kantang My Way.

Nagkaroon ng mainitang pagtatalo sa pagitan ng dalawang grupo na  humantong sa pananaksak sa magkaibigan ng suspek.