MANILA, Philippines - Isang 54-anyos na umano ay no. 2 man ng Korean Mafia at sinasabing no. 2 most wanted din sa South Korea ang nadakip.
Ang suspek ay kinilalang si Lee Byeong Ko, alyas “Bruce Lee†at tubong South Korea.
Ayon kay Manila Police District Director Chief Supt. Isagani F. Genabe Jr., may isang buwang surveillance ang isinagawa bago nadakip ang suspek na natunton sa loob ng isang Korean Restaurant na matatagpuan sa panulukan ng Pedro Gil at J.Bocobo St., Malate, Maynila, kamakalawa ng alas-4:00 ng hapon.
Nabatid na humingi ng police assistance sa MPD ang Bureau of Immigration (BI), kaugnay sa warrant for deportation ng suspek.
Ang suspek ay undocumented simula noong isang taon, nang kanselahin ang passport niya ng Korean Embassy dahil sa tinakasang mga kaso na may kaugnayan sa fraud, robbery, kidnapping, drugs at firearms at iba pang mabibigat na kaso na nangyari sa kanilang bansa.
Dahil sa pagkadakip ng suspek ay posibleng may madawit at mabunyag na ‘contact’ ng nasabing dayuhan sa loob ng Immigration kaya ito nakapanatili ng matagal sa bansa.
Nabatid na ang no. 1 man ng Korean Mafia ay nagtatago rin sa bansa at patuloy pang pinaghahanap.