Umawat sa away: Supervisor tinarakan, tigok

MANILA, Philippines - Tigok ang isang 34-na taong gulang na supervisor habang umaawat nang saksakin ng kaaway ng kanyang pinsan sa Sta. Ana, Maynila, kahapon ng madaling araw.

Tagos sa puso ang saksak sa kaliwang dibdib  na ikinasawi ng biktimang si  Sonny Tuazon, supervisor ng Prime Line Corporation at naninirahan sa  #1537-4 Zapiro St., San Andres, Maynila.

Sinubukan pang ilig­tas ng mga doktor sa Sta. Ana Hospital ang biktima pero binawian din ng buhay.

Sugatan din ang isang Erwin Bautista, 35, ng  #2641 Barobo St., Sta. Ana, Maynila, na umawat din sa away.

Tumakas naman ang mga suspek na kilala lamang sa alyas “Dagul” at isang alyas “Tulindoy”, na sumugod umano sa loob ng bahay ni Jonas Nuguid, 34, sa  #2567 Pasig Line St., Sta. Ana, Maynila.

Sa imbestigasyon ni SPO3 Rodelio Lingcong ng Manila Police District-Homicide Section, dakong alas-2:15 ng mada­ling araw nang maganap ang insidente sa bahay ni Nuguid.

Bago maganap ang insidente ay sinasabing nag-inuman ang biktimang si Tuazon at pinsang si Nuguid sa tahanan  nito, kasama si Bautista dahil piyesta umano sa lugar.

Habang nagkakasa­yahan ang tatlo ay big­lang dumating sina Dagul at Tulindoy. Sinapak umano ni Dagul si Nuguid hanggang sa magsitayo at umawat umano ang pinsang si Tuazon kaya siya ang tinarakan ni Dagul.

Nasugatan din sa braso si Bautista sa pag-awat, hanggang sa tumakas na ang dalawang suspek. Hinala ng imbestigador na may dati nang alitan kaya sinugod si Nuguid ng mga suspek.