MANILA, Philippines - Utas ang isang 55-taong gulang na mister makaraang pagbabarilin ng riding-in-tandem habang ang biktima ay busy sa pagte-text sa kanyang cell phone sa bayan ng Lianga, Surigao del Sur kamakalawa ng gabi.
Sa ulat ng Lianga Police Station, nakilala ang nasawi na si Ramon Pandi, residente sa Brgy., Poblacion, Mahayahay Linga, Surigao del Sur.
Nangyari ang pamamaril sa waiting shed sa Purok 4 ng naturang Barangay ganap na alas-8:00 ng gabi
Ayon sa pulisya, nakatayo umano si Pandi sa lugar at busy sa pagte-text nang dumating ang dalawang suspek sakay ng motorsiklo at biglang pagbabarilin ang biktima.
Patay agad ang biktima habang mabilis namang nakatakas ang mga suspek.
Narekober sa lugar ang anim na basyo ng kalibre 45 baril na ginamit sa pamamaslang sa biktima.
Patuloy ang imbestigasyon ng awtoridad sa nasabing insidente.