2 Pulis iimbestigahan sa pagpapatakas ng suspek sa away-trapiko

MANILA, Philippines - Dalawang pulis-Las Piñas City ang iimbesti­ga­han dahil sa uma­no’y ginawa nitong pagpapa­takas sa isang suspek na sangkot sa isang traffic incident at sumampal sa isang negosyante na nakagit­gitan nito kama­ka­ilan.

Ayon kay National Ca­pital Regional Police Office (NCRPO) spokes­person Chief Insp. Kim­berly Molitas na pina­im­bes­ti­gahan na ni NCR­PO chief, Director Leonardo Espina sa kanilang Inves­tigation Division ang rek­lamo ng biktima na na­kilalang si Narciso “Jun” Diokno laban kina PO2 Manaoag at PO2 Aclo, kapwa nakatalaga umano sa Las Piñas Com­munity Precinct 7 at inaa­sahang matatapos ang pagsisiyasat sa loob ng 30 araw.

Sa salaysay ni Diokno, lulan siya kanyang puting kotseng Mazda noong Hunyo 12 at nagitgit ng isang gray na Toyota Inno­va sa may Alabang-Zapote Road. 

Galit na lumabas ng sasakyan ang tsuper at ipinagwagwagan ang kanyang tsapa ngunit hindi ito hinarap ni Diokno dahil sa na­ka­ramdam siya ng pa­nga­nib kaya idiniretso ang kanyang sasakyan hang­gang gate ng BF Homes Subdivision kung saan niya hinarap ang galit na lalaki ngunit sinampal umano siya ng tsapa nito.

Tumawag naman ng responde ang mga guwar­diya ng subdibisyon at dumating sina PO2 Ma­naoag at PO2 Aclo, subalit pinatakas umano ng dala­wa ang suspek habang si Diokno ay mag-isang dinala sa presinto at doon umano isinubo sa kanya na pirmahan ang “settlement” o aregluhan sa kaso laban sa dalawang pulis. 

Inakala umano ni Diok­no na maayos na ang gu­sot ngunit paglabas niya ng pre­sinto ay nagparinig pa umano ng pagbabanta ang dalawang pulis laban sa kanya.

Kaya’t inireklamo ni Diokono sa opisina ni Es­pina ang dalawang pulis sa hindi pagsunod sa “standard operating procedure” na dalhin sa presinto ang dalawang panig na sangkot sa isang gusot trapiko, hindi pag­kuha sa pangalan ng sus­pek at hindi pag-aksyon sa kawalang-plaka ng sasakyan ng nakagitgitan ng una.