Andal Sr., 77 pa babasahan ng sakdal

MANILA, Philippines - Nakatakdang basahan ng sakdal ngayong umaga ng QC Regional Trial Court-extension sa Bicutan, Taguig City  ang 78 akusado sa Maguin­danao massacre case hinggil sa pagkamatay ng ika-68 biktima ng krimen na photojournalist na si  Reynaldo “Bebot” Momay.

Inatasan ni QC RTC   Branch 221 Judge Jocelyn Reyes  ang  court’s sheriff na makipag-ugnayan sa  Bureau of Jail Management and Penology para matiyak na makadadalo ang 78 akusado.

Isasailalim na sa pag­­basa ng sakdal ang natu­rang mga akusado matapos makakita ang korte ng probable cause na nagdidiin sa mga ito kaugnay ng kaso.

Ilan sa 78 akusado na  babasahan ng sakdal  sinasabing utak ng krimen ay sina dating  Maguindanao governor Andal Ampatuan Sr., Chief Insp. Sukarno Dicay Sr., Insp. Adbulgapor Abad, Supt. Abdulwahid Pedtucasan at iba pang police officers.

Hindi pa kasama sa arraignment na ito ang iba pang akusado na sina Akmad “Toto” Ampatuan, Sajid Islam Ampa­tuan, Anwar Ampatuan, Anwar Sajid “Ulo” Ampatuan, Anwar “Ipi” Ampatuan Jr.,  Sahid Guiamadil, Kasim Ungkong, backhoe operator Bong Andal, Butukan Malang, Datukan Malang Salibo at Talembo Masukat  dahil nakapending pa ang kani-kanilang petisyon sa korte para makapagpiyansa.

Gayundin ay di ka­sa­ma sa isasalang sa arraignment dahil may naka-pending pang petisyon sina dating  Autonomous Region in Muslim Mindanao governor Andal Ampatuan Jr., Talipan Dilon, Esmail Canapia, Sukarno Badal, Mohamad Sangki, Supt. Abrisana Mundas Maguid, Maktan Daud, Wahades Ampatuan, Mactan Bilungan, Misuari Ampatuan, Salipad Sampago, Taga Bangkulat, Salik Bangkulat, Ibrahim Tatak, Norman Tatak at Not Abdul.