Ex-cop nakauniporme nang mangholdap

MANILA, Philippines - Isang manhunt operation ang isinagawa ng pulisya laban sa dati nilang kabaro na patuloy ang pagsusuot ng uniporme at mangholdap ng turista sa Ermita, Maynila naganap kamakalawa ng hapon.

Ang suspek ay kinila­lang si PO3 Eduardo Cayab­yab, dating nakatalaga sa MPD at residente ng no. 19 Dalisay St., Barangay Plainview, Mandaluyong City at isang di nakilalang lalaki na  kasamahan nitong nangotong habang sakay ng itim na SUV(RND-835).

Batay sa reklamo na idi­nulog sa tanggapan ng MPD General Assignment Section ng mga bik­ti­mang sina Takeshita Hiroyasu, 44, at Imagawa Masaharo, 45, kapwa turistang hapon at pansamantalang nanu­nuluyan sa Room 228 Ri­viera Mansion, Malate, Maynila, dakong ala-1:30 ng hapon, noong Linggo ay katatapos lang nila ku­main sa isang restaurant at habang nag­lalakad sa panulukan ng Mabini at Remedios Sts., Ermita nang sitahin sila ng mga suspek na sakay ng nasa­bing SUV.

Inutusan ng mga suspek ang mga biktima na sumakay sa kanilang sasakyan at ha­bang ang dalawa ay nasa loob ay tinakot silang ikukulong  saka kinunan pa ng litrato at hinalughog ang kanilang kagamitan at nang nakuha ang tinatayang P34,000 cash at saka sila pinababa.