Binata binoga ng sekyu, patay

MANILA, Philippines - Pitong bala ng shotgun ang ibinaon ng isang security guard sa isang 19-anyos na binata na sumugod dahil sa pakikialam ng una sa riot ng kalabang gang malapit sa gate ng binabantayang subdivision kahapon ng madaling-araw sa Brgy.Bayan Luma 7,  Imus City, Cavite.

Ang biktima na di­neklarang dead on arrival  sa Our Lady of Pillar Hospital sa Imus City  ay kinilalang si Vladimir Teves Jr. Ang suspek na nadakip sa isang follow-up operation ay nakilalang si Richard Marto, security guard ng Villa Celina Subdivision, Brgy. Bayan Luma 7.

Sa imbestigasyon ng pulisya, dakong alas-1:20 ng madaling-araw ay naka-duty ang suspek sa gate ng subdivision nang mamataan ang dalawang grupo ng kabataan na nakatakdang mag-riot.

Nagtangkang umawat ang sekyu sa mga kabataan subalit siya ay pinagbabato umano at sinugod umano ng biktima.

Napilitan ang suspek na paputukan ang biktima ng dalang shotgun na ikinasawi nito. -Joy Cantos, Cristina Timbang-