MANILA, Philippines -Halos mahigit pa lamang na isang linggo nakakalaya sa kulungan ang isang lalaking holdaper ay balik agad ito sa selda matapos na maaresto sa panghoholdap sa isang lalaki, kahapon ng madaling araw sa Pasay City.
Ang suspek na muling ikinulong sa Pasay City Jail ay nakilalang si Jessmark Nichols, 20-anyos, binata, miyembro ng Sigue-Sigue Sputnik Gang, at residente ng M. Dela Cruz Ext. ng naturang lungsod.
Batay sa ulat, dakong alas-2:30 ng madaling-araw ay nagpapatrulya ang mga pulis na sina PO1s Judyric Cadiz at Acapulco Castillo ng PCP-7, nang mapansin na hinoholdap ng suspek ang biktima na nakilalang si Jeric Resare, 35, may-asawa, hardinero, residente ng 160 Sitio 2 Block-6, Brgy. Fort Bonifacio, Taguig City sa tapat ng Lion Club videoke bar sa may EDSA.
Agad na nasakote ng mga pulis si Nichols at narekober ang mga gamit na tinangay kay Resare maging ang patalim na gamit sa panghoholdap.
Sa record ng pulisya kalalaya pa lamang ng suspek nitong nakaraang Lunes dahil sa kasong panghoholdap.