MANILA, Philippines - Binoga sa ulo at agad na nasawi ang isang 34-anyos na taxi driver habang nagpi-facebook sa loob ng internet shop, sa Tondo, Maynila, kamakalawa ng gabi.
Ang biktima na hindi na umabot ng buhay sa Jose Reyes Memorial Medical Center (JRMMC) ay nakilalang si Joseph Ypon, residente ng Building 16, Unit 116 Katuparan, Tondo, Maynila bunga ng tinamong bala sa katawan.
Sinasabing dalawang lalaki na sakay ng isang hindi nakuhang plaka na motorsiklo ang mabilis na tumakas matapos ang pagbaril at pagpatay sa biktima.
Inilarawan ang gunman na nakasuot ng itim na jacket, kulay brown na shortpants at helmet na armado ng hindi pa mabatid na kalibre ng baril.
Sa ulat ni SPO2 Glenzor Vallejo ng Manila Police District-Homicide Section, dakong alas-10:30 ng gabi nang maganap ang pamamaril sa loob ng Damache computer shop sa Building 15, Unit 119, Vitas Katuparan, Tondo.
Habang abala umano sa pagpi-facebook ang biktima nang dumating ang mga suspek na riding in tandem, bumaba ang backride na nakahelmet at nang makita ang biktima ay binaril sa ulo, bago bumalik sa motorsiklo at tumakas.
Nagsasagawa pa ng masusing imbestigasyon ang mga tauhan ng Manila’s Finest para maaresto ang mga suspek at mabatid ang motibo ng krimen.