MANILA, Philippines — Tinapos ng Jose Rizal University ang kanilang kamalasan matapos lusutan ang Colegio de San Juan de Letran, 90-86, sa second round ng NCAA Season 100 men’s basketball kahapon sa FilOil EcoOil Centre sa San Juan City.
Nagpaputok si Mart Barrera ng career-high 22 points para tulungan ang Heavy Bombers na wakasan ang four-game losing skid at buhayin ang pag-asa sa Final Four spot.
Bigo ang Knights na maitala ang back-to-back wins.
Hawak ng St. Benilde ang liderato sa bitbit na 10-2 karta kasunod ang Mapua (10-3), nagdedepensang San Beda (8-5), Letran (7-7), Emilio Aguinaldo College (6-6), Lyceum (6-7), Perpetual (6-8), Arellano (5-8), Jose Rizal (4-9) at San Sebastian (3-10).
May walong puntos lamang ang tubong Tanjay City, Negros Oriental na si Barrera sa first half bago humataw sa second half para banderahan ang Heavy Bombers.
Sa unang laro, tinakasan ng University of Perpetual Help System DALTA ang Lyceum of the Philippines University via overtime, 89-83.
Kumolekta si JP Boral ng 18 points, 6 rebounds at 3 assists sa pagpigil ng Altas sa kanilang two-game losing skid para palakasin ang pag-asa sa Final Four.
Nagdagdag si Christian Pagaran ng 16 markers.
Laglag ang Pirates sa ikalawang sunod na kamalasan.