Holt dedepensahan si RHJ sa Finals

MANILA, Philippines — Si PBA Best Import Rondae Hollis-Jefferson ng nagdedepensang TNT Tropang Giga ang numero unang magiging problema ng Barangay Ginebra sa Season 49 PBA Governors’ Cup Finals.

Kaya naman kaila­ngan ng Gin Kings ng matibay na depensa para patahimikin kundi man ay limitahan ang dating NBA player sa panig ng Tropang Giga.

“It’s gonna be a total team effort (defending him),” sabi ni Ginebra guard Stephen Holt na inatasan ni coach Tim Cone na dumepensa sa mga imports sa season-ope­ning conference kagaya ni Hollis-Jefferson.

Kumamada ang 29-anyos na si Hollis-Jefferson ng mga averages na 26.2 points, 12.0 rebounds, 7.2 assists, 3.8 steals at 2.2 blocks sa 4-1 pagsibak ng TNT sa Rain or Shine sa best-of-seven semifinals series.

Isa naman si Holt sa mga naging susi ng Ginebra sa 4-2 pagpapatalsik sa San Miguel sa kanilang semifinals duel.

Nakatakda ang Game One ng championship showdown ng Gin Kings at Tropang Giga sa Linggo sa Ynares Center sa Antipolo City.

Bukod kay Holt ay inaasahan ding babantayan ni import Justin Brownlee si Hollis-Jefferson sa PBA Finals.

“I don’t know if I’ll get the first crack on Rondae. It’s obviously gonna be a mix between me and Justin (Brownlee, but it’s gonna take a total team effort,” wika ni Holt.

Nasa kanilang ika-31 finals appearance, puntirya ng Ginebra ang pang-16 korona.

“So now that we’re here, we have to prepare and get ready. I have to take advantage of this opportunity,” ani Holt.

Isa si Holt sa mga bagong players ni two-time PBA Grand Sam champion coach Tim Cone kasama sina rookie RJ Abarrientos, Maverick Ahanmisi, Ralph Cu, Ben Adamos at ang nagbabalik na si Joe Devance.