MANILA, Philippines — Impresibo ang ipinakitang laro ni Johna Dolorito matapos akbayan ang Lyceum of the Philippines University sa 25-18, 25-15, 18-25, 25-22 panalo kontra sa University of Perpetual Help System DALTA sa 2024 Shakey’s Super League Collegiate Pre-season Championship kahapon sa Rizal Memorial Coliseum.
Pero hindi na rin umabot ang Lady Pirates sa team standings sa Pool B dahil 2-2 lang ang karta sa pagtatapos ng kanilang asignatura sa group stage.
Nasa pangatlo ang Lyceum at nangunguna sa Pool B ang University of Sto. Tomas na may 4-0 marka kasunod ang University of the East (3-1).
Ang top two teams ang sasampa sa susunod na round kung saan hahatiin sa dalawang grupo para muling magharap sa single round robin sa event na suportado ng Shakey’s Pizza Parlor, GCash, Chery Tiggo, F2 Logistics, Peri-Peri Charcoal Chicken, Potato Corner, R and B Milk Tea at Summit Water.
Inirehistro ni Dolorito ang 10 sa kanyang 16 points sa fourth frame para sa Lady Pirates na ipinalasap sa Lady Altas (0-3).