Fajardo hinirang na MVP sa season 48

MANILA, Philippines — Kinoronahan si June Mar Fajardo ng San Miguel Beer bilang Most Valuable Player (MVP) sa ikawalong sunod na pagkakataon sa ginanap na Leo Awards para sa 48th Season ng PBA bago ang opening ceremony ng 49th Season kahapon sa Smart-Araneta Coliseum.

Tinatagurian na ngayon palang bilang Greatest of All Time (GOAT), lalong pinalakas ni Fajardo ang argumento sa bagong parangal na lalong nagpalayo sa kanya sa lahat ng karibal sa kasaysayan.

Wala pang manlalaro na nakapagwagi ng 5 MVPs sa PBA simula nang itinayo ito noong 1975 tampok ang mga alamat na sina Alvin Patrimonio at Ramon Fernandez na may tig-4 bilang pinakamarami bago si Fajardo.

May 3 si Bogs Adornado habang may tig-2 sina Abet Guidaben, Danny Ildefonso, Willie Miller, Benjie Paras at James Yap.

Bukod sa 8 MVP, may 10 Best Player of the Conference awards din ang 34-anyos na si Fajardo sahog pa ang 10 championships, 4 na Finals MVP, 9 na Mythical First Team, 7 All-Defensive Team at 9 na PBA All-Star selections.

Pinangunahan ni Fajardo sa Mythical Team ngayon kasama ang kakamping si CJ Perez, Christian Standhardinger na nasa Terrafirma na ngayon mula sa Ginebra, Chris Newsome ng Meralco at Arvin Tolentino ng NorthPort.

Bida rin siya sa All-Defensive Team kasama sina Newsome at Cliff Hodge ng Meralco pati sina Joshua Munzon ng NorthPort at Kemark Cariño ng Terrafirma.

Swak naman sa All-Second Mythical Second Team sina Rookie of the Year Stephen Holt at Juami Tiongson ng Terrafirma, Hodge, Jason Perkins ng Phoenix at Calvin Oftana ng Talk ‘N Text.

Tinanghal namang Most Improved Player si Jhonard Clarito ng Rain or Shine habang si Paul Zamar ng NorthPort ang nag-uwi ng Sportsmanship Award.