Crossovers diniskaril ng Cool Smashers
MANILA, Philippines — Diniskaril ng Creamline ang hangad na pagsosolo sa liderato ng Chery Tiggo matapos kunin ang 25-20, 24-26, 25-16, 25-19 panalo sa Pool A ng Premier Volleyball League (PVL) Reinforced Conference kahapon sa Philsports Arena sa Pasig City.
Humataw si Bernadeth Pons ng 25 attacks bukod sa 23 excellent receptions para sa 2-1 kartada ng Cool Smashers kapareho ng baraha ng Crossovers.
Nag-ambag si American import Erica Staunton ng 21 markers mula sa 20 attacks at isang block at may 17 at 12 points sina Michele Gumabao at Bea De Leon, ayon sa pagkakasunod.
“Expected na talaga na hindi magiging madali iyong laban. So everyday talaga pinag-aralan namin kung paano sila ika-counter,” wika ni Pons sa Chery Tiggo.
Nakadikit ang Crossovers sa 19-22 sa fourth set kasunod ang dalawang puntos ni Risa Sato, habang ang hataw ni Pons ang sumelyo sa panalo ng Cool Smashers.
Bumira si American reinforcement Khat Bell ng 31 points mula sa 31 attacks sa panig ng Chery Tiggo.
Samantala, tinalo ng Farm Fresh ang Galeries Tower, 25-22, 35-37, 23-25, 25-20, 15-10, para makasampa sa win column.
Bumanat si Columbian import Yeny Murillo ng 29 points mula sa 26 attacks, dalawang blocks at isang ace para sa 1-2 record ng Foxies, habang bagsak ang Highrisers sa 0-3 marka.
“This game showed both good and bad aspects of the team, so we’ll adjust accordingly in training to get the win in our next game,” ani Japanese coach Shota Sato sa pamamagitan ng interpreter.
Nagtala sina Trisha Tubu at Caitlyn Viray ng tig-18 points at may 15 markers at apat na blocks si Ckyle Tagsip para sa Farm Fresh.
Umiskor si Thai import Chuewulim Sutadta ng 19 points bukod sa 19 excellent receptions at 10 excellent digs sa tropa ng Galeries Tower.
Nag-ambag sina France Ronquillo at Grace Bombita ng tig-17 markers kasunod ang 14 points ni Roselle Baliton.
- Latest
