Delgaco laglag sa repechage
PARIS - Matapos ang maningning na pagparada sa kakaibang opening ceremony ng 2024 Paris Olympic Games ay bigo naman sa kanyang unang salang si Pinay rower Joanie Delgaco.
Tumapos sa pang-apat na puwesto si Delgaco sa Heat 2 ng women’s single sculls kahapon sa Vaires-sur-Marne Nautical Stadium dito.
Ang top three rowers lamang ang mabibigyan ng outright entry sa quarterfinals.
Naglista si Delgaco ng oras na 7:56.26 sa ilalim nina top three rowers Karolien Florijn (7:36.90) ng Netherlands, Aurelia-Maxima Katharina Janzen (7:41.15) ng Switzerland at Nina Kostanjsek (7:46.30) ng Slovenia.
Tinalo ni Delgaco sina Nihed Benchandli (8:06.62) ng Algeria at Majdouline El Allaoui (8:30.47) ng Morocco.
May pag-asa pa ang two-time Southeast Asian Games gold medal winner na makasama sa quarterfinals sa kanyang pagsagwan sa repechage ngayong hapon.
“Depende sa draw, puwedeng mag-top two siya sa repechage at makapasok pa rin sa quarterfinals,” ani Philippine Rowing Association president Patrick Gregorio kay Delgaco.
Nakipagsabayan si Delgaco sa top three rowers bago nanghina sa gitna ng 2,000m race kaya siya naungusan ni Kostanjsek para sa third place.
Samantala, nakatakdang lumaban kagabi si gymnast Carlos Yulo sa men’s qualification ng Subdivision 2.
Sasalang naman ngayon sina Pinay gymnasts Aleah Finnegan, Emma Malabuyo at Levi Ruivivar sa artistic gymnastics women’s qualification at si fencer Samantha Catantan sa women’s individual foil.
Sa boxing, sasagupain ni Pinay fighter Aira Villegas si Moroccan Yasmine Mouttaki sa Round of 32 ng women’s 57kgs division.
Sa opening ceremony sa Seine River sakay ng bangka ay ipinakita ng Team PH ang suot na barong na disenyo ni Francis Libiran.
- Latest
