MANILA, Philippines — Kinaldag ng Strong Group-Pilipinas ang United Arab Emirates, 104-79, para sa magarbong panimula ng kampanya nito sa 43rd William Jones Cup kahapon sa Taipei, Taiwan.
Kumamada ng kumpletong 15 puntos, 7 rebounds, 5 assists, 4 steals at 1 tapal si dating PBA champion import Chirs McCullough mula sa San Miguel Beer para sa matamis na pagbabalik sa local team.
Sumuporta sa kanya sina Caelan Tiongson, Tajuan Agee at Kiefer Ravena na may 13, 12 at 11 puntos, ayon sa pagkakasunod.
Humakot naman ng 10 assists at 9 na puntos si RJ Abarrientos habang may 6 puntos, 2 rebounds, 1 assist 1 steal si Dave Ildefonso.
Pare-parehong top prospects sina Tiongson, Abarrientos at Ildefonso sa PBA Rookie Draft ngayon bagama’t hindi sila makakadalo.
Maagang kumawala ang Strong Group sa 32-18 sa first quarter at hindi na prumeno pa tungo sa pagposte ng 25-point win.
Nauwi naman sa wala ang 15 ni Omar Khalid Alameri para sa UAE.
Walang playoffs ang Jones Cup kaya kung sinong No. 1 team sa pagtatapos ng single-round robin format na eliminations ang siyang magiging kampeon.